މުއިއްޒުގެ އެޓޯލް މިނިސްޓްރީ ޕްލޭނަކީ ހާސިލްކުރި ހުރިހާ ބާރެއް ރޫޅާލުން: ވައްޑެ

އިދިކޮޅު ރިޔާސީ ކެންޑިޑޭޓު ޑރ މުހައްމަދު މުއިއްޒުގެ "އެޓޯލް މިނިސްޓްރީ" ޕްލޭނަކީ މިހާތަނަށް ހާސިލްކުރެވުނު ހުރިހާ ބާރެއް ރޫޅާލާނެކަމެއްކަމަށް އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ. 

ހދ ނޮޅިވަރަންފަރުގައި ކުރިއަށްދިޔަ ޖަލްސާގައި ވާހަކަފުޅު ދައްކަވަމުން މުއިއްޒު ވަނީ ކައުންސިލްތަކަށް ހަގީގީ ބާރު ހޯދައިދިނުމަށް މިނިސްޓްރީއެއް އެކުލަވާލާނެކަމަށް ވިދާޅުވެފައެވެ. ކައުންސިލްތަކަށް ފުރިހަމަ ބާރެއް ހޯދައިދޭނީ ޕީޕީއެމް ޕީއެންސީގެ ވެރިކަމެއްގައިކަމަށް މުއިއްޒު ވިދާޅުވެފައިވެއެވެ. 

އެވާހަކަތަކަށް އިޝާރާތްކުރައްވާ މެމްބަރު ވައްޑެ ވަނީ އެއީ ބޮޑު ނުރައްކަލެއްގެ ގޮތުގައި ސިފަކުރައްވާފައެވެ. އެއީ ލާމަރުކަޒީ ސިޔާސަތުގެ ދަށުން މިހާތަނަށް ހާސިލްކުރެވުނު ހުރިހާ ކާމިޔާބީއެއް ރޫޅާލުންކަމަށް ވިދާޅުވިއެވެ.

Advertisement

 

ޑރ. މުއިއްޒު ހުށައަޅާފައިވާ ކައުންސިލްތަކަށް ހާއްސަ މިނިސްޓްރީއާ ގުޅިގެން އުނގޫފާރު ދާއިރާގެ މެމްބަރު ވައްޑެ ކުރެއްވި ޓްވީޓު:

ރައްޔިތުންގެ ކަންބޮޑުވުންތައް ސަރުކާރަށް ނުވަތަ ވުޒާރާތަކާއި ހަމައަށް ގެނެސްދޭނީ ކައުންސިލްތަކުންކަމަށާއި މިހާރަށްވުރެ ފުރިހަމަ ބާރުތަކެއް ކައުންސިލްތަކަށް ދޭނެކަމަށް މުއިއްޒު ވަނީ ވިދާޅުވެފައެވެ. 

މެމްބަރު ވައްޑެގެ ކަންބޮޑުވުންތަކަށް ރައްދުދެއްވާ މުއިއްޒު ވިދާޅުވީ އެފަދަ މިނިސްޓްރީއެއްގެ ބޭނުމަކީ ރައްޔިތުންގެ މަންދޫބުންގެ ކިބައިން ބޭނުންވާ ކަންކަން ސަރުކާރު މެދުވެރިކޮށް ފުރިހަމަކުރެވޭނެ ގޮތް ހެދުންކަމަށެވެ. އަދި އެފަދަ މިނިސްޓްރީއަކާއެކު ސަރުކާރުން ކުރިއަށް ގެންދަން ބޭނުންވާ ކަންކަން ރައްޔިތުން ބޭނުންވާގޮތަށް ކުރިއަށް ގެންދެވޭނެކަމަށް ވިދާޅުވިއެވެ. 

"ބޭނުމަކީ ދުވާލަކު 30 މިނެޓް ކައުންސިލްތަކަށް ނުދެވޭ މިނިސްޓަރަކު ހުރުމުގެ ބަދަލުގައި ކައުންސިލްތަކަށް ފުލް ޓައިމް މިނިސްޓަރެއް ހުރުން"

މުއިއްޒުގެ މިހުށަހެޅުމަށް ގިނަ ބައެއްގެ ފާޑުކިޔުން ސޯޝަލް މީޑިޔާގައި އަންނަނީ އަމާޒުވަމުންނެވެ. އެކަމަކީ ކައުންސިލްތަކުގެ މިނިވަންކަން ގެއްލި، ރަށްރަށުގެ ތަރައްގީއަށް ހުރަސް އެޅޭނެކަމެއްގެ ގޮތުގައި އަންނަނީ ސިފަކުރަމުންނެވެ.