މިޖެހުނީ އެއްތާކު، ޕީޕީއެމް އޮފީސް ހުސްކުރަން ގޭގެ ވެރިފަރާތުން އަންގައިފި

ޕްރޮގްރެސިވް ޕާޓީ އޮފް މޯލްޑިވްސް ހިންގަމުން އަންނަ ހ. ހުރަފާ ހުސްކުރަން އެ ގޭގެ ވެރިފަރާތުން ޕާޓީއަށް ހުކުރު ދުވަހު އަންގައިފި އެވެ.

ޕީޕީއެމް އޮފީސް ހުސްކުރަން އަންގާފައި މި ވަނީ، އެ ޕާޓީން ކުރީގެ ރައީސް އަބްދުﷲ ޔާމީން ދުރަށްޖެހިވަޑައިގެން އާ ޕާޓީއެއް ހެދުމުގެ މަސައްކަތް ފަށާފައިި އޮއްވަ އެވެ. ގޭގެ ވެރިފަރާތުން ފޮނުވި ސިޓީގައި އެދިފައި ވަނީ އެއް ދުވަހުގެ ތެރޭގައި ތަން ހުސްކުރުމަށެވެ.

އެ ސިޓީގައި ބުނެފައި ވަނީ ހ. ހުރަފައިގެ ގްރައުންޑް ފްލޯ އަދި އެއް ވަނަ ފަންގިފިލާ ކުއްޔަށް ދޫކުރީ "ރައީސް ޔާމީންގެ އެދިވަޑައިގަތުމުގެ މަތިން، ރައީސް ޔާމީންގެ އޮފީހެއް ހިންގެވުމަށް" ކަމަށެވެ.

Advertisement

"ކުއްޔަށް ދޫކުރެެވިފައިވާ ތަނުގައި މިހާރު ޕީޕީއެމްގެ އޮފީހެއް ހިންގަމުން އަންނަކަން ވަނީ ފާހަގަ ކުރެވިފަ. ވުމާއެކު ދެ ފަރާތުގެ ދެމެދުގައި ވެފައިވާ އެއްބަސްވުން ނިމުމަކަށް ގެނައުމަށް ނިންމައި، މިއަދު [ނޮވެމްބަރު 24، 2023] ގެ މެންދުރުގެ ކުރިން ތަން ހުސްކޮށް އަޅުގަނޑާ ހަވާލު ކުރުން އެދެން،" އެ ސިޓީގައި ބުނެފައިވެ އެވެ.

ޕީޕީއެމުން ވަކިވެ، ޔާމީން އާ ޕާޓީއެއް ހެދުމަށް ނިންމީ ޕާޓީގެ ލީޑާޝިޕުން އެމަނިކުފާނު އެއްފަރާތްކޮށްފައިވާ ކަމަށް ބުނެ އެވެ. ޔާމީންގެ ފަރާތުން ރައީސް މުއިއްޒަށް ގިނަ ތުހުމަތުތަކެއް ކޮށްފައިވާއިރު އޭގެ ތެރޭގައި، އެމަނިކުފާނުގެ ފޯނު ކޯލަށް ރައީސް ޖަވާބު ނުދެއްވުމާއި ޖަލު ހުކުމުން މިނިވަން ނުކުރުން ހިމެނެ އެވެ.

މީގެ ކުރިން ޕީޕީއެމްގެ އެންމެ ވާދަވެރި ޕާޓީ، އެމްޑީޕީގެ ރައީސްއަކަށް ހުރި ރައީސް މުހައްމަދު ނަޝީދު (އަންނި) އެ ޕާޓީއިން ވަކިވެވަޑައިގަތުމަށްފަހު އާ ޕާޓީއެއް އުފެއްދެވުމަށް މަސައްކަތް ފެށި ހިސާބުން އެމްޑީޕީއިން އޭރު އެ ޕާޓީގެ ހަރުގެ ހިނގަމުން އައި އިމާރާތް ހުސްކުރަން އެ ގޭގެ ވެރިފަރާތުން ވަނީ އަންގައި، އެތަން ނަގައިފައެވެ. އެމްޑީޕީ ހަރުގެ ހިންގިތަން މިހާރު ބޭނުން ކުރަމުން އަންނަނީ ރައީސް ނަޝީދު އިސްވެހުރެ އުފެއްދެވި ޑިމޮކްރެޓްސް ޕާޓީއިންނެވެ.