މި ދައުރު ނިމުމުގެ ކުރިން ހައްޖުގެ އަގު 50،000ރ. އަށް ހެޔޮކުރަން އަމާޒު ހިފައިފި

ސަރުކާރުގެ މި ދައުރު ނިމުމުގެ ކުރިން ރާއްޖެ އިން މީހުން ހައްޖަށް ގެންދިއުމަށް ނަގާ އަގު 50،000ރ. އަށް ހެޔޮކުރަން ހައްޖު ކޯޕަރޭޝަނުން އަމާޒު ހިފައިފި އެވެ.

ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު ވިދާޅުވީ، ރައީސް ޑރ. މުހައްމަދު މުއިއްޒު ގަބޫލުކުރައްވާ ގޮތުގައި ހައްޖަށް މީހުން ގެންދިއުމަށް މީހެއްގެ އަތުން މިހާރު ނަގަމުން އަންނަ 69,965ރ. އަގަކީ ދިވެހި ރައްޔިތުންގެ އަތުން ނަގަންވާ ވަރަށް ވުރެ ބޮޑު އަދަދެއް ކަމަށެވެ.

އެހެންކަމުން ހައްޖަށް މީހުން ގެންދިއުމަށް ދައްކަން ޖެހޭ އަގު ކުޑަކުރުމަކީ ރައީސްގެ ވަރަށް ބޮޑު އެދިވަޑައިގަތުމެއްކަމަށާއި ހައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދައި އެ އަގު ހެޔޮ ކުރަން މަސައްކަތް ކުރަމުން އަންނަ ކަމަށް ވިދާޅުވި އެވެ.

Advertisement

ޝަކީލް ވިދާޅުވީ ކުރިއަށް އޮތް ތިން އަހަރުގެ ތެރޭގައި ނަތީޖާ ފެންނާނެ ކަމަށާއި އަމާޒަކީ އެންމެ ބޮޑު ވެގެން 50،000ރ. އަށް އަގު ތިރިކުރުން ކަމަށެވެ.

ހައްޖަށް ގެންދިއުމުގެ އަގުގެ ގޮތުގައި ކުރިން އަމިއްލަ ކުންފުނިތަކުން ނަގަމުން އައީ، ގާތްގަނޑަކަށް 70،000ރ. އެވެ. ސަރުކާރުގެ 100 ޕަސެންޓް ހިއްސާ އޮންނަ ހައްޖު ކޯޕަރޭޝަނުން ހައްޖު ދަތުރަކަށް މީހަކަށް ނަގަނީ 69,965ރ. އެވެ