މަސީހަށާއި ޖަމީލަށް ރިޔާސީ ޓިކެޓާއި ރަނިން މޭޓުކަން ދޭން އުޅޭކަމުގެ އަޑުތަކެއް

ރައްޔިތުންގެ މަޖިލީހުގެ ކުރީގެ ރައީސް އަބްދުﷲ މަސީހަށާއި ކުރީގެ ނައިބުރައީސް ޑރ މުހައްމަދު ޖަމީލު އަހުމަދަށް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ރިޔާސީ ކެންޑިޑޭޓުކަން ހަވާލުކުރުމަށް ހަމަޖެހިފައިވާކަމުގެ އަޑުތަކެއް ފެތުރެން ފަށައިފިއެވެ. 

ރާއްޖޭގެ ނޫހެއް ކަމުގައިވާ ރާއްޖެ އެމްވީއިން ވަނީ މިކަން އެނޫހަށް ކަށަވަރުވެފައިވާކަން ހާމަކޮށްފައެވެ. 

އެހެންނަމަވެސް ޕީޕީއެމްއިން ވަނީ މިވާހަކަަތައް ދޮގުކޮށްފައެވެ. ޕީޕީއެމްއިން އަންނަނީ ހުއްޓުމެއްނެތި އެޕާޓީގެ ރިޔާސީ ކެންޑިޑޭޓަކަށް ވާނީ މިވަގުތު ޖަލު ހުކުމެއް ތަންފީޒުކުރައްވަމުން ގެންދަވާ ރައީސް އަބްދުﷲ ޔާމީންކަން ހާމަކުރައްވަމުންނެވެ. ޕީޕީއެމްއިން ވަނީ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހެޅުއްވުމަށް ކަރެންޝަންސް މެދުވެރިކޮށް ރައީސް ޔާމީންގެ ސޮއިވެސް ހޯއްދަވާފައެވެ. 

Advertisement

ޕީޕީއެމްގެ ރަނިން މޭޓަކަށް އައްޔަންކުރައްވާނެ ބޭފުޅަކާއިމެދު ޕާޓީގެ ތެރޭގައި އަންނަނީ މަޝްވަރާކުރަމުންނެވެ. އެއީ ރައީސް ޔާމީނަށް ލިބިފައިވާ ރަނިން މޭޓު އައްޔަންކުރުމުގެ ބާރު ބޭނުންނުކޮށް ލީޑަރޝިޕަށް އެކަން ކުރުމަށް ހަވާލުކޮށްފައިވާތީއެވެ.

ރައީސް ޔާމީނަކީ ރިޔާސީ ކެންޑިޑޭޓަކަށް ހެދުމަށް މަސައްކަތްކުރި ނަމަވެސް ރިޔާސީ އިންތިޚާބުގައި ރައީސް ޔާމީނަށް ވާދަކުރެއްވުމުގެ ފުރުސަތު ވަރަށް ހަންޏެވެ. 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާއިރު އެމައްސަލަ އިސްތިއުނާފްކުރުމަށް ހައި ކޯޓަށް ހުށަހަޅާފައިވަނިކޮށް މައްސަލަ ބައްލަވާ ފަނޑިޔާރަކު ވަނީ ޗުއްޓީއަށް ވަޑައިގެންފައެވެ. އެހެންކަމުން ރިޔާސީ އިންތިޚާބުގެ ކުރިއަށް މައްސަލަ ނިންމިދާނެ ކަމާމެދު މިހާރު ވަނީ ސުވާލު އުފެދިފައެވެ.