މަޖިލީސް މެމްބަރުންގެ މުސާރަ ހައްދެއް ނެތްވަރަށް ބޮޑުކުރާތީ ރައްޔިތުންގެ ކަންބޮޑުވުން

ރައްޔިތުންގެ މަޖިލިހުގެ މެމްބަރުން ހިމެނިވަޑައިގަންނަވާ ގޮތަށް ދައުލަތުގެ އިސް ވެރިންގެ މުސާރަ އަށް މަޖިލިހުން ގެންނަން އުޅޭ ބޮޑު ބަދަލާ ގުޅިގެން އާންމުންގެ ގިނަ ބަޔަކު ކަންބޮޑުވުން ފާޅުކޮށް، މަޖިލިސް ކޮންޓްރޯލް ކުރަމުން އަންނަ އެމްޑީޕީ އަށް މިއަދު ފާޑު ކިޔަން ފަށައިފިއެވެ.

އެމްޑީޕީގެ އަޣުލަބިއްޔަތު އޮންނަ މާލިއްޔަތު ކޮމިޓީން އިއްޔެ ވަނީ ރައީސް އާއި ނައިބު ރައީސް އާއި މަޖިލިހުގެ މެމްބަރުންގެ އިތުރުން މަޖިލިހުގެ ރައީސް އާއި ނައިބު ރައީސް އާއި ވަޒީރުންނާއި ފަނޑިޔާރުންނާއި މިނިވަން މުއައްސަސާތަކުގެ މެމްބަރުންނާއި މޭޔަރުންނާއި ކައުންސިލަރުންގެ މުސާރަތައް އަލުން ރިވިއުކޮށް، އެ މުސާރަތައް ބޮޑު ކުރުމަށް ނިންމައިފައެވެ. މި މުސާރަތައް ބޮޑު ކުރަން އަންނަ އަހަރަށް ލަފާކޮށް ކުރީ ސަރުކާރުން މަޖިލިހަށް ހުށަހަޅައިގެން ފާސްކުރި ބަޖެޓުގައި ވެސް އޮތެވެ.

މަޖިލިހުގެ މާލިއްޔަތު ކޮމިޓީގެ މި ނިންމުމާ ގުޅިގެން ވަރަށް ގިނަ ބައެއްގެ ފާޑު ކިއުން އެންމެ ބޮޑަށް އަމާޒުވެފައި ވަނީ އެމްޑީޕީގެ މެމްބަރުންނަށެވެ. މިކަމުގައި ސަރުކާރުން ބުނެފައި ވަނީ މުސާރަތައް ބޮޑު ކުރުމާ ގުޅޭ ގޮތުން މަޝްވަރާކޮށްފައި ނުވާ ކަމަށެވެ. އަދި މުސާރަތައް ބޮޑު ކުރުމަކީ ރައީސް ޑރ. މުހައްމަދު މުއިއްޒު ބޭނުންފުޅުވާ ގޮތް ނޫން ކަމަށާއި މިއީ ސަރުކާރާ މެދު ރައްޔިތުންގެ ހިތްތަކުގައި ނަފްރަތު އުފެއްދުމަށް އެމްޑީޕީން ކުރި ކަމެއް ކަމަށް ސަރުކާރުން ބުނެފައިވެއެވެ.

Advertisement

މާލިއްޔަތު ކޮމިޓީގެ ނިންމެވުމާ ގުޅިގެން ރައީސް ޑރ. މުހައްމަދު މުއިއްޒު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސް، ނައިބު ރައީސް އަދި ވަޒީރުންގެ މުސާރަ ބޮޑުކުރުމަށް ސަރުކާރުން އެދިފައި ނުވާނެ ކަމަށެވެ. އެއްވެސް މަޝްވަރާއެއް ކުރުމެތް ނެތި މި ގެނައި ބަދަލުގެ ސަބަބުން ލިބޭ މުސާރައިގެ ކުރިއެރުން ކުޑަކުދިންގެ ހިޔާފަދަ އިޖްތިމާއީ ފަންޑަކަށް ހަދިޔާކުރަން އެމަނިކުފާނު ނިންމަވާފައިވާ ކަމަށް ވެސް ރައީސް ވަނީ ވިދާޅުވެފައެވެ.

ކޮމިޓީގެ ނިންމުމާ ހިޔާލު ތަފާތުވާ މީހުން ބުނާ ގޮތުގައި މިއީ އެމްޑީޕީ އަށް ވެރިކަން ނުލިބުނީމަ ކޮށްގެން އުޅޭ ކަމެކެވެ. އަދި އެމްޑީޕީގެ ބޭނުމަކީ ރައްޔިތުން ސަރުކާރާ މެދުގައި ޖައްސައި ނަފްރަތު އުފެއްދުން ކަމަށް ވެސް އެ މީހުން ދަނީ ބުނަމުންނެވެ.