ކޮންމެ ރަށެއްގައި ނުބުނިނަމަވެސް، ހުރިހާ ރަށަކަށް ގެދޮރުވެރިކަން ފޯރުކޮށްދޭނަން: މުއިއްޒު

ކޮންމެ ރަށެއްގައި ވަކިވަކިން ނުބުނި ކަމުގައިވިޔަސް, އެރަށަކަށް ބޭނުންވާ ގޮތަށް ކޮންމެ ރަށަކަށްވެސް ގެދޮރުވެރިކަން ފޯރުކޮށްދޭނެކަމަށް އިދިކޮޅު ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ނ. މާފަރު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި މާފަރު ރައްޔިތުންވެސް ގެދޮރިވެރިކަމުގެ މަޝްރޫއަކަށް ބޭނުންވާކަން ފާހަގަކުރެވިފައިވާކަމަށް ވިދާޅުވިއެވެ. 

މުއިއްޒު ވިދާޅުވީ ގެދޮރުވެރިކަމަކީ ކޮންމެ ރަށެއްގެ ރައްޔިތުންވެސް ބޭނުންވާ ކަމެއްކަމަށާއި އެހެންނަމަވެސް އެކި ރަށުން ބޭނުންވާ ގޮތް ތަފާތުވާ ކަމަށެވެ. ބައެއް ރަށްތަކުގައި ރޯ ހައުސް އެޅުމަށް ބޭނުންވާއިރު ބައެއް އެހެން ރަށްތަކުގައި ގޯތި ދޫކުރުމަށް ރައްޔިތުން އެދޭކަމަށް ވިދާޅުވިއެވެ. 

Advertisement

"އަޅުގަނޑު ކޮންމެ ރަށެއްގައި މިވާހަކަ ނުދަންނަވަން، އެކަމަކު ޖުމްލަކޮށް ހުރިހާ ރައްޔިތުންނަށް ދޭ ޔަގީންކަމަކީ ގެދޮރުވެރިކަމަކީ އެންމެ މުހިންމު ސިޔާސަތޭ! އެއީ ލުއި ލޯނު ދިނުން ކަމުގައިވިޔަސް، ގެދޮރު ބިނާކޮށްދީގެން ކަމުގައިވިޔަސް"

ބިން ބޮޑެތި ރަށްތަކުގެ ރައްޔިތުން ބޭނުންވަނީ އެރައްޔިތުންނަށް ގޯތި ލިބުންކަމަށާއި އެރައްޔިތުންނަށް ލުއި ލޯނު ލިބޭނެ ގޮތް ހަމަޖެހި ގެދޮރު އިމާރާތްކުރެވޭނެ ގޮތް މަގުފަހިކޮށްދޭނެކަމަށް މުއިއްޒު ވިދާޅުވިއެވެ. ބިމުގެ ދަތިކަން ކުރިމަތިވެފައިވާ ރަށްތަކަށް ހައުސިން މަޝްރޫއުތައް ހިންގައިދޭނީ ބިން ހިއްކުމަށްފަހުގައިކަމަށްވެސް މުއިއްޒު ވިދާޅުވިއެވެ. 

ރާއްޖޭގެ ކޮންމެ ރަށަކަށްވެސް ގެދޮރުގެ ޔަގީންކަން ފޯރުކޮށްދޭނެ ކަމަށާއި ގެދޮރުވެރިކަމުގެ ތެރޭގައި މިކަންކަން ހިމެނޭކަމަށް މުއިއްޒު ވިދާޅުވިއެވެ.