ކެނދިކުޅުދޫ ދާއިރާގެ މަޖިލިސް ބަހުސް މިރޭ!

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ކެނދިކުޅުދޫ ދާއިރާއަށް ވާދަ ކުރައްވާ ތިން ކެންޑިޑޭޓުންގެ މެދުގައި ބާއްވާ ބަހުސް މިރޭ އޮންނާނެ އެވެ.

ދައުލަތުގެ މީޑިޔާ، ޕީއެސްއެމް އިން ކުރިއަށް ގެންދާ "މަޖިލިސް ބަހުސް" ސިލްސިލާގެ ތެރެއިން ކެނދިކުޅުދޫ ދާއިރާއަށް ކުރިމަތިލާ ކެންޑިޑޭޓުންގެ ބަހުސް އޮންނާނީ މިރޭ 08:30 ގަ އެވެ.

މަޖިލިސް އިންތިހާބުގައި ކެނދިކުޅުދޫ ދާއިރާއަށް ވާދަކުރާ ތިން ކެންޑިޑޭޓުންނަކީ 

Advertisement

1. ކެންޑިޑޭޓް ނަމްބަރު 1 - ހުސެއިން ސާލިމް މުހައްމަދު (އެމްޑީއޭ)
2. ކެންޑިޑޭޓް ނަމްބަރު 2 - އަބްދުﷲ ޝަހީދު (އެމްޑީޕީ)
3. ކެންޑިޑޭޓް ނަމްބަރު 3 - މުހައްމަދު އަފޫ ހާމިދު (ޕީއެންސީ) އެވެ.  

ކެނދިކުޅުދޫ ދާއިރާގެ ބަހުސަށް ފަހު މިރޭ 10:30 ގައި މަނަދޫ ދާއިރާގެ ބަހުސް ވެސް އޮންނާނެ އެވެ.

މި ފަހަރުގެ ބަހުސްގައި އާންމު ރައްޔިތުންނަށް ވެސް ކެންޑިޑޭޓުންނާ ސުވާލު ކުރުމުގެ ފުރުސަތު އޮތީ ހުޅުވާލާފަ އެވެ. އެގޮތުން އެ ދާއިރާއެއްގެ ކެންޑިޑޭޓަކާ ކުރަން ބޭނުންވާ ސުވާލުތައް އެސްއެމްއެސްގެ ޒަރީއާއިން ހުށަހެޅުމުގެ ފުރުސަތު ވަނީ ހުޅުވާލާފަ އެވެ.

ސުވާލު ފޮނުވާނީ [MB (space) constituency name, question to 300] / އެމް.ބީ (ސްޕޭސް) ދާއިރާގެ ނަން، ސުވާލު ލިޔުއްވުމަށްފަހު 300 އަށެވެ.

މި ދެ ބަހުސް ވެސް، ޕީއެސްއެމް ގެ "ޔެސް ޓީވީ"އިން ވަގުތުން ދައްކާނެ އެވެ.

ރައްޔިތުންގެ މަޖިލީހުގެ އިންތިހާބު އޮންނާނީ އަންނަ މާޗު މަހުގެ 17 ވާ އާދީއްތަ ދުވަހު އެވެ.