"ޖަލު ހުކުމާއި، ދަރަންޏެއް އޮތުމުން ރައީސް ޔާމީނަށް ވާދަނުކުރެއްވޭނެ"

އަންނަ ރިޔާސީ އިންތިޚާބުގައި ރައީސް އަބްދުﷲ ޔާމީނަށް ވާދަނުކުރެއްވޭނެކަމަށް އިލެކްޝަންސް ކޮމިޝަނުން ނިންމި ނިންމުމަށް ސުޕްރީމް ކޯޓުން ތާއީދުކޮށްފިއެވެ. 

ރައީސް ޔާމީންގެ ފަރާތުން އިލެކްޝަންސް ކޮމިޝަންގެ ނިންމުމާއި ދެކޮޅަށް ހުށަހެޅި މައްސަލައިގައި ހުކުމް އިއްވާފައިވަނީ މިއަދެވެ. 

ސުޕްރީމް ކޯޓުން އިއްވި ހުކުމުގައި ރައީސް ޔާމީންގެ ކެންޑިޑެސީ ފޯމުގައި ދެމައްސަލައެއް އޮތްކަން ފާހަގަކޮށްފައިވެއެވެ. އެއީ ސާބިތު ދަރަންޏެއް އޮތުމާއި ޖަލު ހުކުމެއް އޮތުމެވެ. 

Advertisement

ކޯޓުގެ ނިންމުމުގައި ވަނީ ކޮންމެ ނަމެއްގައި އޮތަސް ފައިސާއެއް ދައްކަން ޖެހިފައިވާނަމަ އެވާނީ ދަރަންޏަކަށް ކަމަށް ބުނެފައެވެ. އެގޮތުން ދަރިންގެ ޚަރަދުކަމުގައިވިޔަސް، ޖޫރިމަނާއެއް ކަމުގައިވިޔަސް، މިއިން ކޮންމެ ފައިސާއަކީ ދަރަންޏެއްކަމަށް ކޯޓުން ވަނީ ނިންމާފައެވެ. މައްސަލަ އިސްތިއުނާފްކޮށްފައި އޮތުމަކީ ފައިސާ ދައްކަންނުޖެހޭ ސަބަބެއް ނޫންކަމަށާއި ފައިސާ ދައްކަން ދައްކަން ފަސްކުރުމުގެ އަމުރެއް ކޯޓުން ނުނެރޭހާ ހިނދަކު އެފައިސާ ނުދައްކާ އޮތްނަމަ އެކަން ވާނީ ސާބިތު ދަރަންޏަކަށްކަމަށް ކޯޓުން ނިންމިއެވެ. 

ޖަލު ހުކުމާއި ގުޅޭގޮތުން ކޯޓުން ނިންމި ނިންމުމުގައި ގާނޫނުއަސާސީގެ 109ވަނަ މާއްދާއާއި ހަވާލާދީ މައްސަލަ ބެއްލެވި ފަނޑިޔާރުން ވަނީ ޖިނާއީ ކުށެއް ސާބިތުވެ 1 އަހަރަށްވުރެ ދިގު މުއްދަތެއްގެ ޖަލު ހުކުމެއް އައިސްފައިވާނަމަ ރިޔާސީ އިންތިޚާބަށް ކުރިމަތިލެއްވޭނީ ހުކުމް ތަންފީޒުކޮށް ނިމުމަށްފަހު 3 އަހަރު ފަހުން ކަމަށެވެ. 

އީސީގެ ނިންމުން ބަދަލުކޮށްދިނުމަށް އެދި ސުޕްރީމް ކޯޓަށް ހުށަހެޅުމުން އެމައްސަލަ ބައްލަވާފައިވަނީ ސުޕްރީމް ކޯޓުގެ ހުރިހާ ފަނޑިޔާރުން ހިމެނިވަޑައިގަންނަވާ ބެންޗަކުންނެވެ.