އިންތިޚާބުގައި ވާދަކުރެއްވުމަށް މުއިއްޒު ޕީއެންސީއަށް

ރިޔާސީ އިންތިޚާބުގައި ވާދަކުރެއްވުމަށް މާލެ ސިޓީ ކައުންސިލްގެ މޭޔަރ ޑރ މުހައްމަދު މުއިއްޒު ޕީއެންސީއަށް ސޮއިކުރައްވައިފިއެވެ. 

ޕީޕީއެމްގެ ފަރާތުން އިންތިޚާބަށް ނެރޭނެ ކެންޑިޑޭޓަކީ ރައީސް އަބްދުﷲ ޔާމީންކަމަށް ނިންމައި، ރައީސް ޔާމީންގެ ކެންޑިޑެސީ ފޯމު އިލެކްޝަންސް ކޮމިޝަނަށްވެސް ހުށަހެޅިއެވެ. އެހެންނަމަވެސް، އީސީން ވަނީ ރައީސް ޔާމީނަށް އިންތިޚާބުގައި ބައިވެރިނުވެވޭނެކަމަށް ނިންމާފައެވެ. 

އިންތިޚާބުގައި ވާދަކުރުމަށް މުއިއްޒު ނިންމީ، ރައީސް ޔާމީނަށް ކުރިމަތިނުލެވިއްޖެ ހާލަތުގައި އިންތިޚާބުގައި ބައިވެރިވެ އިންތިޚާބު ކާމިޔާބުކުރުމަށްފަހު ރައީސް ޔާމީން މިނިވަންކުރުމަށެވެ. 

Advertisement

ޕީއެންސީން މިއަދު ބޭއްވި ސެނެޓް ބައްދަލުވުމުގައި އެޕާޓީންވެސް ކެންޑިޑޭޓަކު ނެރުމަށް ނިންމިއެވެ. އަދި މިއަދު 2:00އާއި ހަމައަށް ކެންޑިޑޭޓްކަމަށް ކުރިމަތިލުމަށް ވަނީ ހުޅުވާލާފައެވެ. ޕީއެންސީން މިގޮތަށް ކަން ކޮށްފައިވަނީ ރައީސް ޔާމީންގެ އިޒުނަފުޅާއެކުއެވެ. 

ވ. އާރަށް ކުއްޔަށް ދޫކުރުމުގައި ރިޝްވަތުގެ ފައިސާ ގަބޫލުކޮށް އެފައިސާ ލޯންޑަރ ކުރިކަމުގެ ކުށް ސާބިތުވެ ރައީސް ޔާމީން އަންނަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ. އެހުކުމް އިސްތިއުނާފްކުރުމަށް ހައި ކޯޓަށް ހުށަހެޅިނަމަވެސް، މައްސަލަ ބައްލަވާ 3 ފަނޑިޔާރުންގެ ތެރެއިން އެއް ފަނޑިޔާރު ޗުއްޓީއަށް ވަޑައިގަތުމުން އެމައްސަލަ އޮތީ މަޑުޖެހިފައެވެ.