އިންތިޚާބުގައި ވާދަކުރެއްވުމަށް ކެންޑިޑެސީ ފޯމުގައި ޔާމީން ސޮއިކުރައްވައިފި

ކުރިއަށް އޮތް ރިޔާސީ އިންތިޚާބުގައި ވާދަކުރެއްވުމަށް ކެންޑިޑެސީ ފޯމުގައި ކުރީގެ ރައީސް އަބްދުﷲ ޔާމީން ސޮއިކުރައްވައިފިއެވެ. 

ރައީސް ޔާމީން ކެންޑިޑެސީ ފޯމުގައި ސޮއިކުރައްވާފައިވަނީ މޯލްޑިވްސް ކަރެކްޝަނަލް ސަރވިސްގެ އެހީތެރިކަމާއެކުގައެވެ. 

ރައީސް ޔާމީން ސޮއިކުރައްވާފައިވާ ފޯމު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އަށް ލިބިފައިވާކަން އެޕާޓީން ވަނީ މީޑިޔާތަކަށް ކަށަވަރުކޮށްދީފައެވެ. އެހެންނަމަވެސް އެލިޔުންތައް އީސީއަށް ހުށަހަޅާނެ ތާރީހެއް ޕީޕީއެމްއިން ހާމަކޮށްފައެއް ނުވެއެވެ.

Advertisement

ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ކުރިމަތިލުމުގެ ފުރުސަތު އިލެކްޝަންސް ކޮމިޝަންއިން ހުޅުވާލީ އިއްޔެއެވެ. އެފުރުސަތު ހަމަވާނީ އަންނަ އޮގަސްޓް މަހުގެ 7 ވަނަ ދުވަހުއެވެ. 

ޕީޕީއެމްގެ ކެންޑިޑޭޓަކު ނެތި ބާއްވާ އިންތިޚާބަކީ އިންސާފުވެރި އިންތިޚާބަކަށް ނުވާނެކަމަށް އީސީގެ ނައިބުރައީސް ފުއާދު ތައުފީގް ވަނީ ވިދާޅުވެފައެވެ. ފުއާދާއި މެދު ހިތްހަމަނުޖެހި އީސީގެ މެމްބަރުންގެ މެދުގައި އިތުބާރު ނެތްކަމުގެ ވޯޓެއް ނަގައި އޭނާގެ މައްޗަށް އިތުބާރު ނެތްކަމަށް މިހާރު ވަނީ ފާސްކޮށްފައެވެ. އެހެންނަމަވެސް، އީސީގެ މެމްބަރަކު ވަކިކުރުމުގެ ބާރެއް އީސީއަށް ލިބިގެނެއް ނުވެއެވެ. އެބާރު ލިބިފައިވަނީ ރައްޔިތުންގެ މަޖިލީހަށެވެ.