އިންތިހާބަށް ތިން ދުވަސް: ރައީސްގެ އޮޑިކޮޅުން ފުންމާލައި އެމްޑީއޭ މުއިއްޒުއަށް ތާއީދު ކުރަން ނިންމައިފި

މި އަހަރުގެ ރިޔާސީ އިންތިހާބަށް އެމްޑީއޭ އިން އެމްޑީޕީއާ އެކު ހަދާފައިވާ ކޯލިޝަން ރޫޅާލައި، އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރަން ނިންމައިފި އެވެ.

އެމްޑީއޭ އިން އެގޮތަށް ނިންމާފައި ވަނީ ރޭ އެ ޕާޓީގެ ކައުންސިލްގައި ނެގި ވޯޓެއްގައެވެ. އެމްޑީއޭ ކައުންސިލަށް އެކަން ހުށަހެޅުއްވީ އެ ޕާޓީގެ ކައުންސިލް މެމްބަރު މުހައްމަދު އައްބާސްއެވެ. އެކަމަށް ތާއީދު ކުރެއްވީ އެމްޑީއޭގެ ނައިބު ރައީސް އަލީ މައުރޫފެވެ.

އެމްޑީއޭގެ ލީޑަރު އަދި ރައްޔިތުންގެ މަޖިލިހުގެ ދ. މީދޫ ދާއިރާގެ މެމްބަރު އަހުމަދު ސިޔާމް ރިޔާސަތު ބެލެހެއްޓެވި ބައްދަލުވުމުގައި ރޭ އެގޮތަށް ފާސްވީ އެމްޑީއޭ ކައުންސިލް ބައްދަލުވުމުގައި ބައިވެރިވެވަޑައިގެންނެވި 35 މެމްބަރުންގެ ތެރެއިން 33 މެމްބަރުންގެ ވޯޓުންނެވެ. އެ ހުށަހެޅުމާ ދެކޮޅަށް އަދި ރައީސް އިބްރާހިމް މުހައްމަދު ސޯލިހަށް ތާއީދުކޮށް ވޯޓު ދެއްވާފައި ވަނީ އެންމެ ދެ މެމްބަރުންނެވެ.

Advertisement

ސިޔާމް އިސްވެ ހުންނަވައި އުފައްދަވާފައިވާ އެމްޑީއޭއަކީ މި މަހުގެ 9 ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ރައީސް އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ތާއީދުކޮށް އެމްޑީޕީއާ އެކުގައި ކޯލިޝަން ހެދި ޕާޓީއެކެވެ. އެމްޑީޕީ އާ އެކުގައި ފުރަތަމަ ބުރު ކޯލިޝަން ހެދި އެމްޑީއޭގެ އިތުރުން އަދާލަތު ޕާޓީއެވެ.

އިންތިހާބުގެ ދެ ވަނަ ބުރުގެ ވޯޓު ލުމަށް ހަތަރު ދުވަހަށް ވެފައި ވަނިކޮށް، އެމްޑީއޭ އިން ނިންމި މި ނިންމުމާ އެކު، އެމްޑީޕީ ނުވަތަ ރައީސް އިބްރާހިމް މުހައްމަދު ސޯލިހާ އެކު ކޯލިޝަން ޕާޓްނަރެއްގެ ގޮތުގައި ދެން ހަރަކާތްތެރިވާނީ އަދާލަތު ޕާޓީ އެކަންޏެވެ.