ގުރައިދޫ ގޮނޑި އެމްޑީޕީއަށް: އަތޮޅުތެރެއިން ސަރުކާރުގެ ތަރައްގީ ބަލައިގެންފި

ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބައި އިލެކްޝަން އެމްޑީޕީގެ ކެންޑިޑޭޓް އިބްރާހީމް ޝާޒް ކާމިޔާބުކުރައްވައިފިއެވެ

ވަގުތީ ނަތީޖާ ދައްކާގޮތުން ޝާޒުއަށް އިންތިޚާބުގައި ވަނީ 1340 ވޯޓު ލިބިވަޑައިގެންފައެވެ. އޭނާއާ އެންމެ ގާތުން ވާދަކުރެއްވީ ޕީޕީއެމް ކެންޑިޑޭޓު ހުސައިން ރިޒާ އާދަމެވެ. އޭނާއަށް ލިބިވަޑައިގެންފައިވަނީ 1226 ވޯޓު ކަމަށް ވަގުތީ ނަތީޖާއިން ދައްކައެވެ.

މިއާއެކު އެމްޑީޕީއަށް މަޖިލީހުގެ 68 ގޮނޑި މިހާރު ވަނީ ލިބިފައެވެ. ކުރިން ގުރައިދޫ ދާއިރާގެ މެމްބަރަކަށް ހުންނެވީ ޕީޕީއެމްގެ މެމްބަރެކެވެ.

Advertisement

އިލެކްޝަންސް ކޮމިޝަނުން ބުނި ގޮތުގައި، މި ދާއިރާއަށް ވޯޓުލުމުގެ ހައްގު 3،423 މީހަކަށް ލިބިފައިވެ އެވެ. ވޯޓުލުމުގެ ވަގުތު ހަމަވިއިރު، އޭގެ ތެރެއިން ވޯޓުލީ 2،755 މީހުންނެވެ. އެއީ ގާތްގަނޑަކަށް 80 ޕަސެންޓެވެ.

ގުރައިދޫ ދާއިރާގެ ބައި އިލެކްޝަންގެ ވޯޓުލުން ފުރަތަމަ ތާވަލުކުރީ މިއަދުގެ ހެނދުނު 8 އިން ހަވީރު 4 އަށް ކަމަށް ވިޔަސް މޫސުން ގޯސްވެ، ވިއްސާރަވުމުގެ ސަބަބުން ވޯޓުލުމަށް މީހުން ނުކުތުމަށް ދަތިވެފައި ވާތީ، ވީހާ ވެސް ގިނަ ބަޔަކަށް ވޯޓުލުމުގެ ފުރުސަތު ދިނުމުގެ ގޮތުން ހަވީރު ފަހެއް ޖަހަންދެން އިލެކްޝަންސް ކޮމިޝަނުން ވަގުތު އިތުރު ކުރިއެވެ.

ގުރައިދޫ ދާއިރާގެ ބައި އިލެކްޝަންގެ ކެމްޕެއިން ކުރިއަށް ގެންދިޔައީ ސަރުކާރުން އެ ދާއިރާގައި ކުއްލި ގޮތަކަށް އެކި ކަހަލަ މަޝްރޫއުތައް ފެށުމުން އެއީ ސީދާ ވޯޓަށް ނުފޫޒު ފޯރުވުމުގެ އަމަލުތައް ކަމަށް ބުނެ ޕީޕީއެމާއި އެމްއެންޕީގެ ވެސް ޝަކުވާތަކާ އެކު އެވެ. ބައެއް މައްސަލަތައް އޭސީސީ އަށް ވެސް ހުށަހަޅާފައިވާ ކަމަށް ޕީޕީއެމުން ބުނެފައި ވެއެވެ.

ނަމަވެސް އެމްޑީޕީއިން ވަނީ މި ލިބުނު ގޮނޑިއަކީ އެއީ ސަރުކާރުން އަތޮޅުތެރެ ތަރައްގީކުރަން ކޮށްފައިވާ މަސައްކަތުގެ ނަތީޖާކަމަށް ބުނެފައެވެ.