ނަތީޖާ އިއުލާން ނުކުރަނީސް ހަސަން ލަތީފް ބޮޑު ތަފާތަކުން ކާމިޔާބުވިކަމަށް ބުނެފި

މިހާތަނަށް ގުނި ވޯޓުތަކަށް ބަލާއިރު، ޑިމޮކްރެޓްސްގެ ރައީސްކަން ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ބޮޑު ތަފާތަކުން ކާމިޔާބުކުރެއްވި ކަމަށް ބުނުމުން އެ ޕާޓީގެ މެމްބަރުންގެ ފާޑުކިޔުން އަމާޒުވެއްޖެއެވެ.

ޑިމޮކްރެޓްސްގެ ފުރަތަމަ އެތެރޭގެ އިންތިހާބުގައި 5،883 މީހަކަށް ވޯޓުލުމުގެ ހައްގު ލިބިފައިވެ އެވެ. ރާއްޖޭގެ ހުރިހާ ރަށެއްގައި ވެސް އެ އިންތިހާބުގެ ވޯޓުލުން ހެނދުނު 10:00 އިން 4:00 އާ ހަމައަށް ކުރިއަށްގެންދިޔަ އެވެ.

އެ ޕާޓީން ބުނެފައިވާ ގޮތުގައި ވަގުތީ ނަތީޖާ ވެސް އިއުލާން ކުރާނީ މާދަމާގެ ވަގުތެއްގަ އެވެ. ވޯޓުގެ ނަތީޖާ އިއުލާން ކުރުން ލަސްވި ސަބަބުތައް އެ ޕާޓީން ހާމަކޮށްފައި ނުވެ އެވެ. އެހެން ނަމަވެސް އެނގިފައިވާ ގޮތުގައި ރައީސްކަމަށް ވާދަކުރައްވާ ދެ ބޭފުޅުންގެ ތެރެއިން ކުރީގައި އުޅުއްވަނީ ހަސަން ލަތީފެވެ. މިހާތަނަށް ގުނުނު ވޯޓުތަކުން، ދެ ބޭފުޅުންގެ މެދުގައި 150 ވޯޓެއްހާ ފަރަގު އުޅެ އެވެ. ރަށްރަށުން ނުލިބި ހުރި ވޯޓުތަކުގެ އަދަދު އެއަށްވުރެ މަދު ކަމަށްވެ އެވެ.

Advertisement

އެކަމާ ގުޅިގެން އެ ޕާޓީގެ އާންމު މެމްބަރުން ދަނީ އެކި ޕްލެޓްފޯމްތަކުގައި ނުރުހުން ފާޅުކޮށް މިރޭ ނަތީޖާ އިއުލާން ކުރުމަށް ޑިމާންޑް ކުރަމުންނެވެ.

"ރިޔާސީ އިންތިހާބުގެ ވަގުތީ ނަތީޖާ ވެސް އެރޭ 9:00 ކުރިން ލިބުނު! އެެއީ އަދި މުޅި ރާއްޖޭ އާއި އެކިއެކި ޤައުމު ތަކުގަ ބެހެއްޓި ފޮށިތަ! ބަލައިނުގެނެވޭނެ! މިރޭ ވާނެ ވަގުތު ނަތީޖާ އިއުލާން ކުރަން މިހާރުވެސް މާ ލަސްވެެއްޖެ!," ޑިމޮކްރެޓްސްގެ އެކްޓިވިސްޓު އަހްމަދު އަންވަރު ބުނެފައިވެ އެވެ.

ޑިމޮކްރެކްޓްސްގެ ފުރަތަމަ އެތެރޭގެ އިންތިހާބުގައި ވޯޓު ލާފައި ވަނީ ރައީސް، ނައިބް ރައީސް (އާންމު)، ނައިބް ރައީސް (އަންހެން)، ނައިބް ރައީސް (ޒުވާން)، ވިމެން ޑިމޮކްރެޓްސް ލީޑަރު، ވިމެން ޑިމޮކްރެޓްސް ޑެޕިއުޓީ ލީޑަރު، ޔަންގް ޑިމޮކްރެކްޓްސް ލީޑަރު އަދި ޔަންގް ޑިމޮކްރެޓްސް ޑެޕިއުޓީ ލީޑަރު ހޮވުމަށެވެ.