ކޯލިޝަން ހަދަންވާނީ ޝަރުތެއް ނެތި، ލިބޭ މިންވަރު ބަލާކަށް ނުޖެހޭނެ: އަދުރޭ

އިދިކޮޅު ރިޔާސީ ކެންޑިޑޭޓް ޑރ މުހައްމަދު މުއިއްޒާއެކު ކޯލިޝަން ހަދަން އަންނަންވާނީ އެއްވެސް ޝަރުތެއް ނެތިކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ. 

ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާ ދެ ކެންޑިޑޭޓުންކަމަށްވާ ޑރ މުއިއްޒު އަދި ރައީސް އިބްރާހިމް މުހައްމަދު ސޯލިހު އަންނަނީ ރިޔާސީ އިންތިޚާބުގައި ވާދަކުރެއްވި ކެންޑިޑޭޓުންނާއި ޕާޓީތަކުގެ ތާއީދު ހޯއްދެވުމަށް މަސައްކަތްކުރަމުންނެވެ، ރައީސް ސޯލިހު ފުރަތަމަ ބުރަށް ކުރިމަތިލެއްވީވެސް އަދާލަތު ޕާޓީ އަދި އެމްޑީއޭގެ ކޯލިޝަނަކާއެކުގައެވެ. 

ޑރ މުއިއްޒުއާއެކު ދެވަނަ ބުރަށް ކޯލިޝަން ހަދާފައިވަނީ އެމްއެންޕީއިންނެވެ. މުއިއްޒު އަދި ރައީސް ސޯލިހުވެސް ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި މަޝްވަރާކުރައްވާފައެވެ. ރައީސް މުހައްމަދު ނަޝީދުގެ ޑިމޮކްރެޓްސްގެ މަޝްވަރާތަކަށް ކުރިއެރުމެއް ލިބިފައިވާކަން އެނގިފައެއް ނެތެވެ. އަމިއްލަގޮތުން ވާދަކުރެއްވި ފާރިޝް މައުމޫންވެސް އަދި ވަކިގޮތެއް ނުނިންމަވައެވެ.

Advertisement

އދ. މަހިބަދޫގައި ކުރިއަށްގެންދިޔަ ޖަލްސާގައި އަބްދުއްރަހީމް ވިދާޅުވީ ކޯލިޝަން ހަދަން އަންނަންވާނީ ކޯލިޝަނުން ބައި އަޅާނީ ކިހާ މިންވަރަކަށްތޯ ބެލުމަށްފަހުގައި ނޫންކަމަށެވެ. ކޯލިޝަނަކީ ކޭކެއްގެ ގޮތުގައި ސިފަކުރައްވާ، އަބްދުއްރަހީމް ވަނީ ކޯލިޝަން ހަދަން އަންނަންވާނީ ކޭކުން ލިބޭނީ ކިތައް ފޮތިތޯ ބެލުމަށްފަހުގައި ނޫންކަމަށެވެ. 

"މިއީ ޤައުމީ މަސައްކަތެއް، އަންނަންވާނީ ސަރުކާރު ބަދަލުކުރުމުގެ ޖޯޝާއި ރޫހުގައި"

އަބްދުއްރަހީމް ވިދާޅުވީ ސަރުކާރު ބަދަލުކުރުމަކީ މިއަދު ދިރިތިބި ކޮންމެ ރައްޔިތެއްގެ މަސްއޫލިއްޔަތެއްކަމަށެވެ. އެހެންކަމުން ކޯލިޝަން ހަދާއިރު ތިމާއަށާއި ޕާޓީއަށް އޮތީ ކޮން ފައިދާއެއްތޯ ބަލަން ނުޖެހޭނެކަމަށާއި ޕާޓީއަށް ލިބެނީ ކެބިނެޓުން ކިތައް އިންސައްތަތޯވެސް ބަލަން ނުޖެހޭނެކަމަށް ވިދާޅުވިއެވެ. ކޯލިޝަން ހަދަންވާނީ ލިބޭ އަމިއްލަ މަންފާއަކަށް ނުބަލާކަމަށްވެސް ވިދާޅުވިއެވެ.

ޕީއެންސީއާއެކު އެމްއެންޕީން ކޯލިޝަން ހެދީ ޝަރުތަކާއި ނުލާކަމަށް އަބްދުއްރަހީމް ވިދާޅުވިއެވެ. އެކަމަށް އަބްދުއްރަހީމްވަނީ އެމްއެންޕީއަށް ސާބަސް ދަންނަވާފައެވެ.