ޗާގޮސް މައްސަލަ ރާއްޖެއިން ކާމިޔާބުކޮށްފި

އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓޮލްސް)ގައި ކުރިއަށްދިޔަ ޗާގޯސް މައްސަލަ ރާއްޖެއިން ކާމިޔާބުކޮށްފިއެވެ. 

އިޓޮލްސްއިން ނިންމި ނިންމުމުގައި ވަނީ ރާއްޖެއަށް ބޮޑު ބައި ލިބޭ ގޮތަށެވެ. އިޓޮލްސްއިން ނިންމާފައިވަނީ ފުށުއަރާފައިވާ ސަރަހައްދު "އިކުއި-ޑިސްޓަންސް" އުސޫލުން ބެހުމަށެވެ.

މޮރިޝަސްއިން އިޓޮލްސްއަށް ހުށަހެޅި މިމައްސަލާގައި އެގައުމުން އެދިފައިވަނީ ރާއްޖެއާއި މޮރިޝަސްގެ ކޮންޓިނެންޓަލް ޝެލްފް ބައުންޑަރީ ކަނޑައަޅައިދިނުމަށެވެ. މޮރިޝަސްއިން ބޭނުންވީ އިން ކަނޑައަޅާއިރު އެގައުމުގެ ފަރުގެ ސަރަހައްދުގެ ތެރޭގައި ހިމެނޭ "ބްލެންހެމް ރީފް"އިން ފެށިގެން ކަނޑައެޅުމަށެވެ. އެހެންނަމަވެސް ރާއްޖެއިން ވަނީ އެއީ ހިކިފަސް ތަނަކަށް ނުވާތީ، އެސަރަހައްދުން ފެށިގެން އިން ކަނޑައެޅުމަކީ ބަލައިގަނެވޭނެކަމެއް ނޫންކަމަށް ބުނެ ވަކާލާތު ކޮށްފައެވެ. 

Advertisement

"ބްލެންހެމް ރީފް"އަކީ ބޭސް ޕޮއިންޓްއަކަށް ބަލައި އިން ކަނޑައަޅާކަމުގައިވާނަމަ، މޮރިޝަސްއަށް އިތުރަށް 4،687 ކިލޯމީޓަރު ލިބެއެވެ. 

ރާއްޖެއާއި މޮރިޝަސްގެ އިމުން 95،000 އަކަކިލޯމީޓަރުގެ ސަރަހައްދެއް ފުށުއަރަ އެވެ. 

ރާއްޖެއިން ވަނީ ހުށަހެޅި ހުށަހެޅުންތަކަށް ބާރުލިބޭ ލިޔެކިޔުންތަކާއި، ސެޓެލައިޓް ފޮޓޯތައް ހުށަހަޅާފައެވެ. 

ޗާގޮސް ނުވަތަ ފޯޅަވައްސަކީ ރާއްޖޭގެ ދެކުނުން އޮންނަ ސަރަހައްދެކެވެ. މޮރިޝަސްއަށްވުރެ ރާއްޖެއާއި ކައިރިއަށް އޮންނަ މިސަރަހައްދަކީ މިހާރު އިނގިރޭސިވިލާތުން ބަލަހައްޓަމުން އަންނަ ތަނެކެވެ. މޮރިޝަސްގެ މީހުން ކުރިން މިތަނުގައި އުޅުނު ނަމަވެސް އިނގިރޭސިވިލާތުގެ އިސްތިއުމާރުގެ ދަށުގައި މޮރިޝަސް އޮތްއިރު، އެގައުމުގެ މީހުން އެތަނުން ބާލުވައި، އެތަނަކީ މިހާރު އިނގިރޭސިވިލާތުގެ އަސްކަރީ ބޭހެކެވެ.