އާ ޕާޓީއެއް އުފައްދަވަން ޔާމީން ޕީޕީއެމް ދޫކޮށްލައްވައިފި

ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީން އެ ޕާޓީ ދޫކޮށްލައްވައި، އާ ޕާޓީއެއް ހައްދަވަން ނިންމަވައިފި އެވެ.

އެމަނިކުފާނުގެ ގާނޫނީ ވަކީލު ޑރ. މުހަންމަދު ޖަމީލް އަހުމަދު ޗެނަލް 13 ގައި މިރޭ ވާހަކަ ދައްކަވަމުން ވިދާޅުވީ ރައީސް ކަމަށް ޑރ. މުހަންމަދު މުއިއްޒު ވަޑައިގެންނެވި ފަހުން ފޯނު ނުނަންގަވާ ކަމަށާއި ގައުމު ދަނީ ނުރައްކާތެރި ދިމާއަކަށް ކަމަށެވެ.

އޭނާ ވިދާޅުވީ ޕީޕީއެމް އާއި ޕީއެންސީ އަށް ޔާމީން ދެން ބާރު ނުފޯރުއްވާނެ ކަމަށެވެ.

Advertisement

"ޚުދު ޕީޕީއެމްގެ ލީޑާޝިޕުން ވެސް ބޭނުމެއް ނުވޭ ރައީސް ޔާމީންގެ މަޝްވަރާއެއް އިރުޝާދެއް ވެސް،" ޖަމީލް ވިދާޅުވި އެވެ.

"އެމަނިކުފާނު ރައްޔިތުން އެދުނު ގޮތަށް ރ. އިބޫގެ ވެރިކަން ބަދަލުކުރައްވަން ހުރިހާ މަސައްކަތެއް ކޮށްދެއްވި. އެހެނަސް މިއަދު ޕާޓީގެ ލީޑާޝިޕްގެ ވިސްނުން އެމަނިކުފާނާ ތަފާތު. އެބޭފުޅުން އެމަނިކުފާނާ ދުރަށް ހިނގައްޖެ. އެހެންކަމުން އެމަނިކުފާނު ޕީޕީއެމުން އިސްތިއުފާ ދެއްވައިފި," ޑރ. ޖަމީލް މިރޭ ވިދާޅުވެފައިވެ އެވެ.

ޔާމީންގެ ފަހަތްޕުޅުގައި އެތައް ބަޔަކު ތިއްބެވި ކަމަށާއި މަޖިލިސް އިންތިހާބު ކާމިޔާބު ކުރުމަށް ޕީޕިއެމަކީ ޕާޓީއެއް ނޫން ކަމަށާއި ޕާޓީ އޮތީ ހައިޖެކް ކޮށްފައި ކަމަށް ވެސް ޖަމީލް ވިދާޅުވި އެވެ. ޕީޕީއެމާ އެކު ރާއްޖޭގެ އެތަކެއް ހާސް ރައްޔިތުން މަގުމަތިކޮށްލުމުގެ ފުރުސަތު ޔާމީން ނުދެއްވާނެ ކަމަށް ޖަމީލް ވިދާޅުވި އެވެ.

ރައީސް މައުމޫން އަބްދުލްގަައްޔޫމްގެ ދިވެހި ރައްޔިތުންގެ ޕާޓީ (ޑީއާރުޕީ) ދެކަފިވެ ޕީޕީއެމްގެ ނަމުގައި ޕާޓީއެއް ރެޖިސްޓްރީ ކުރީ އޮކްޓޯބަރު 17, 2011 ގައި އެވެ. އޭގެ ފަހުން އެ ޕާޓީގެ ރިޔާސީ ޓިކެޓުގައި 2013 ގެ ރިޔާސީ އިންތިހާބު ކާމިޔާބު ކުރައްވައި ވެރިކަމަށް ވަޑައިގެންނެވީ ޔާމީނެވެ.