އަދުރޭ ޔާމީނަށް: ވަކި މީހަކަށްވުރެން މި ގައުމު މާ ބޮޑު!

ކުރީގެ ރައީސް އަބްދުالله ޔާމީން ޕްރޮގްރެސިވް ޕާޓީ އޮފް މޯލްޑިވްސް ދޫކުރައްވައި ސަރުކާރާ ވަކިން ސިޔާސީ ހަރަކާތްތައް ފަށްޓަވަން ނިންމެވުމާ އެކު "ކޮންމެ މީހަކަށް ވުރެ މި ގައުމު މާ ބޮޑު" ކަމަށް ވިދާޅުވެ ސަރުކާރުގެ ދިފާއުގައި ރައީސް ޑރ. މުހައްމަދު މުއިއްޒުގެ އެޑްވައިޒަރު އަބްދުއްރަހީމް އަބްދުالله (އަދުރޭ) ނުކުމެވަޑައިގަނެފި އެވެ.

ޕީޕީއެމް/ޕީއެންސީގެ އެތެރޭގައި ޖެހުނު މައްސަލަތަކާ އެކު ޔާމީން އާ ޕާޓީއެއް އުފައްދަވަން ވަނީ ނިންމަވާފަ އެވެ. މިހާރު ވެރިކަމުގައި ތިއްބެވި ޕީޕީއެމްގެ ލީޑާޝިޕްގެ ބޭފުޅުން އެމަނިކުފާނަށް ބޭވަފާތެރިވެ ބަގާވާތެއް ކުރައްވާފައިވާ ކަމަށް ވަކީލުން މެދުވެރިކުރައްވައި އެމަނިކުފާނު ވަނީ ހާމަކުރައްވާފަ އެވެ.

އެކަން އެހެން ހިނގާފައި ވަނިކޮށް މި ސަރުކާރުގެ ދިފާއުގައި މިރޭ ވަޒީރުން ގެންދަވަނީ ޓްވީޓު ކުރައްވަމުންނެވެ. މި ސަރުކާރުގެ އެންމެ ބާރުގަދަ ބޭފުޅާގެ ގޮތުގައި ފާހަގަކުރެވޭ އަބްދުއްރަހީމް ވަނީ ޕީޕީއެމް/ޕީއެންސީއަކީ ގައުމު އިސްކުރާ ދެ ޕާޓީ ކަމަށް ވިދާޅުވެފަ އެވެ.

Advertisement

"އަޅުގަނޑުމެން މިތިބީ ދިވެހި ރައްޔިތުންގެ ނިންމުމާ އެއްގޮތަށް ޑރ. މުއިއްޒުއާ އެކު ފިސާރި ސާބިތުވެ. މާތް الله ގެ ވާގިފުޅާ އެކު ރައީސް މުއިއްޒުގެ ސަރުކާރުގެ ވެގެންދާނީ ދިވެހި ގައުމީ ރައްޔިތުންނަށް އުފާ ފާގަތިކަން ގެނެސްދޭނެ ސަރުކާރަކަށް. ފަސްއެނބުރި ބެލުމެއް ނެތި އަޅުގަނޑުމެން ދާނީ ކުރިއަށް," އަބްދުއްރަހީމް ވިދާޅުވެފައިވެ އެވެ.

އޭނާ ވަނީ ރައްޔިތުންނަށް ވެސް އެންމެ ރަނގަޅު ގޮތަކީ ރައީސް މުއިއްޒުގެ ސަރުކާރާ އެކު ސާބިތުވެ ތިބުން ކަމަށް ވިދާޅުވެފަ އެވެ.

ކުރިން ސިޔާސީ މައިދާނުގައި ރައީސް ޔާމީންގެ އެންމެ ލޯޔަލް އެކެއްގެ ގޮތުގައި ބެލެވުނު އަދުރޭ ވަނީ ޔާމީން ޖަލަށް ގެންދެވުމާއެކު ޕީޕީއެމް ޕީއެންސީ ލީޑް ކުރެއްވުމާ ހަވާލުވެވަޑައިގެން މިދިޔަ ފަސް އަހަރުގެ ތެރޭ އެ ދެ ޕާޓީއިން ކުރިއަށް ގެންދިޔަ ހުރިހާ ހަރަކާތެއްގެ މޭސްތިރިޔާގެ ގޮތުގައި ހަރަކާތްތެރިވެފައެވެ.

އޭގެ އިތުރުން އަބްދުއްރަހީމްއަކީ ރައީސް މުއިއްޒުއަށް ވެރިކަން ކާމިޔާބު ކޮށްދެއްވުމަށް އެންމެ ބޮޑު މަސައްކަތެއް ކުރެއްވި އެއް ބޭފުޅާ އެވެ. އަބްދުއްރަހީމް ވަނީ ކެމްޕޭނު ދުވަސްވަރު، ރައީސް މުއިއްޒު އާއެކު ހުރިހާ ރަށަކަށްހެން ވަޑައިގެންފަ އެވެ.