100 ދުވަސްތެރޭ 300 ދޮގު ހަދައިފި، އަނދަވަޅަކަށް ނުގޮސް ސަލާމަތް ވާނީ އެމްޑީޕީއަށް މަޖިލިސް ދީގެން: ފައްޔާޒް

ރާއްޖެ އިތުރު އަނދަވަޅަކަށް ނުގޮސް ސަލާމަތް ވާން އޮތީ މަޖިލީހުގެ މެޖޯރިޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް ދީގެން ކަމަށް ޕާޓީގެ ޗެއާޕާސަން އަލްއުސްތާޒް ފައްޔާޒް އިސްމާއިލް ވިދާޅުވެއްޖެ އެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް އެމްޑީޕީގެ ކެމްޕެއިން "މިސްރާބު ހަމަ މަގަށް" ހަރަކާތް ލޯންޗު ކުރުމުގެ ޖަލްސާގައި ވާހަކަދައްކަވަމުން ފައްޔާޒް ވިދާޅުވީ ރައީސް ޑރ މުހައްމަދު މުއިއްޒުގެ ސަރުކާރުން ވެރިކަމަށް އައީ ދޮގުތަކެއްގެ މައްޗަށް ބިނާކޮށް ކަމަށެވެ.

އަދި ވެރިކަމުގެ 100 ދުވަސްތެރޭ 300 ދޮގު ރައްޔިތުންނަށް ހަދައިފި ކަމަށް ފައްޔާޒް ވިދާޅުވި އެވެ.

Advertisement

ފައްޔާޒް ވިދާޅުވީ އެ ދޮގުތަކުގެ މައްޗަށް ވެރިކަން ބިނާކޮށް، އެ ނާގާބިލުކަންމަތީ ވެރިކަން ހިންގުމަށް ކުރާ މަސައްކަތުން މިހާރު ފެނިގެން ދަނީ މުޅި ރާއްޖޭގެ އިގްތިސާދު ފުނޑުފުނޑު ވެގެން ދާތަން ކަމަށެވެ.

"ކުރިއަށް އޮތީ ބަނަ ދުވަސްތަކެއް. އަދިވެސް ބޮޑު އަނދަވަޅަކަށް ރާއްޖެ ވައްޓާ ނުލައި ހިފެހެއްޓޭނީ މަޖިލިސް މެޖޯރިޓީ އެމްޑީޕީއަށް އޮވެގެން. މިއަދު ވެސް އެ އަނިޔާވެރިކަމަށް ނުގޮސް ހިފެހެއްޓިފައި މިއޮތީ މަޖިލީހުގައި އެމްޑީޕީގެ މެޖޯރިޓީ އޮތުމުން،" ފައްޔާޒް ވިދާޅުވި އެވެ.

މީގެ އިތުރުން މިއަދު ރާއްޖެ ގޮސްފައި މިއޮތް ހާލަތުން ސަލާމަތްކޮށް، ދެންވެސް ހަމަ މަގަށް އެޅޭނީ މިސްރާބު ހަމަ މަގަށް އެޅުވުމަށް، މަޖިލީހުގެ މެޖޯރިޓީ އެމްޑީޕީއަށް ދީގެން ކަމަށް ފައްޔާޒް ވިދާޅުވި އެވެ.